İstənilən dili sərbəst öyrənməyin yolları

Yeni dili sərbəst öyrənmək aşağıdakı tövsiyələrə əməl etməklə daha asan ola bilər.

24media.az edu-live.com-a istinadən xəbər verir ki, əksər insanlar dil öyrənərkən əsas məqsəd kimi həmin dildə sərbəst danışmağı məqsəd qoyurlar. Bu proses ilk mərhələdə çətin və qorxuducu görünə bilər, lakin müəyyən vərdişləri formalaşdırmaq və düzgün üsullardan istifadə etmək öyrənmə prosesini asanlaşdıra bilər.

Yeni dilin mühitinə daxil olun

Dil öyrənən insan gündəlik həyatında həmin dildən nə qədər çox istifadə edərsə, öyrənmə prosesi bir o qədər asanlaşa bilər. Bunun üçün mobil telefonun dilini öyrəndiyiniz dilə dəyişə, həmin dildə podkastlara qulaq asa və filmlərə baxa bilərsiniz. Dil mühitinə daxilolma metodu dil öyrənməyin ən effektiv üsullarından biri hesab olunur. Bu yanaşma həmçinin sözlərin müxtəlif kontekstlərdəki məna çalarlarını və danışıq dilinə xas ifadələri mənimsəməyə kömək edir.

Özünüzə ən uyğun dilöyrənmə platformasını seçin

Lingoda, Fluenz və iTalki kimi platformalar dil öyrənmə prosesini sürətləndirə bilər. Burada əsas məqam məqsədlərinizə uyğun vasitəni seçməkdir. Məsələn, videozəng vasitəsilə dərslər keçmək və sertifikatlı müəllimlərlə öyrənmək istəyirsinizsə, iTalki platformasından istifadə edə bilərsiniz.

Öyrənmə prosesini planlaşdırın

Dil öyrənmə prosesinin sistemli şəkildə təşkil edilməsi faydalı ola bilər. Məsələn, yerinə yetirməli olduğunuz tapşırıqları bölmək və dilin hər bir istiqamətinə müəyyən vaxt ayırmaq irəliləyişinizi izləməyə kömək edər. Bunun üçün gündəlik planınızı belə qura bilərsiniz: 15 dəqiqə sözlərin təkrarı, 30 dəqiqə dinləmə və oxu, 15 dəqiqə isə danışıq məşqləri.

Dil qanunauyğunluqlarını təhlil edin

Hər bir dil onu digər dillərdən fərqləndirən özünəməxsus xüsusiyyətlərə və qanunauyğunluqlara malikdir. Buna görə də cümlə quruluşuna diqqət yetirmək, həmin dildə cümlələrin necə formalaşdığını və hansı modellər əsasında qurulduğunu öyrənmək vacibdir. Bu yanaşma sadəcə dərslikdəki tapşırıqları yerinə yetirməklə müqayisədə daha səmərəli ola bilər.

Yeni dili sərbəst öyrənmək tamamilə mümkündür. Bunun üçün əsas məsələ düzgün strategiya seçmək və öyrənmə prosesində ardıcıl olmaqdır.

Tərcümə etdi: Nərmin Məmmədzadə

MDU-da iki yeni laboratoriya istifadəyə verilib

5 oktyabr – Beynəlxalq Müəllimlər Günü münasibətilə Mingəçevir Dövlət Universitetində Rəqəmsal Mühəndislik və “MathStage” laboratoriyalarının açılış mərasimi keçirilib.

24media.az xəbər verir ki, tədbirdə Mingəçevir Dövlət Universitetinin rektoru Anar Eminov, “Azərbaycan İES” MMC-nin direktoru Təhmasib Hüseynov və universitetin əməkdaşları iştirak ediblər.

Rəqəmsal Mühəndislik Laboratoriyası tələbə və müəllimlərin mühəndislik sahəsində müasir rəqəmsal texnologiyalardan istifadəsi, nəzəri biliklərin praktiki fəaliyyətlə möhkəmləndirilməsi və yeni texnoloji bacarıqların formalaşdırılması üçün nəzərdə tutulub. Burada tədris prosesi, praktiki məşğələlər və tələbə layihələrinin həyata keçirilməsi üçün müvafiq imkanlar yaradılıb.

“MathStage” Laboratoriyası isə riyaziyyatın interaktiv və tətbiqyönümlü şəkildə tədrisinə, eləcə də tələbələrin məntiqi düşünmə və problem həll etmə bacarıqlarının inkişafına xidmət edəcək.

Laboratoriyaların Beynəlxalq Müəllimlər Günü münasibətilə istifadəyə verilməsi müasir təhsil mühitinin formalaşdırılması və müəllim əməyinə verilən dəyərin nümayişi baxımından əhəmiyyətli addım kimi qiymətləndirilir.

Qeyd edək ki, Mingəçevir Dövlət Universitetində bu istiqamətdə həyata keçirilən layihələr tələbələrin əmək bazarının tələblərinə uyğun bilik və bacarıqlar əldə etməsinə, praktiki hazırlıqlarının gücləndirilməsinə və tədris imkanlarının genişləndirilməsinə yönəlib.

Həvva Cəbrayılova

Türkiyənin Koç Universitetinin professoru BDU-da məruzə edib

Türkiyənin Koç Universitetinin professoru Vərqa Kələntərov Bakı Dövlət Universitetinin (BDU) Mexanika-riyaziyyat və Fizika fakültələrinin birgə elmi seminarında “Navye-Stoks və Kleyn-Qordon tənlikləri” mövzusunda məruzə edib.

24media.az AZƏRTAC-a istinadən xəbər verir ki, məruzədə Navye-Stoks tənlikləri, qeyri-xətti Kleyn-Qordon tənliyi və onların müxtəlif modifikasiyaları üçün başlanğıc-sərhəd məsələləri, həllərin varlığı və yeganəliyi, eləcə də zamana görə asimptotik davranışı ilə bağlı elmi nəticələrə dair icmal təqdim olunub.

Professor Vərqa Kələntərov əvvəlcə Navye-Stoks problemi haqqında məlumat verib. Bildirib ki, üçölçülü fəzada Navye-Stoks tənliklərinin hamar qlobal həllərinin mövcudluğu və zəif həllərin yeganəliyi riyazi fizikanın uzun müddətdir araşdırılan fundamental problemlərindəndir.

Qeyd olunub ki, Navye-Stoks problemi Kley Riyaziyyat İnstitutunun müəyyən etdiyi yeddi “Minilliyin problemi”ndən biridir və onun həlli üçün 1 milyon ABŞ dolları məbləğində mükafat nəzərdə tutulub.

Məruzədə, həmçinin bu istiqamətdə son elmi yeniliklərə toxunulub.

Piranə Xasiyeva

MDU-da regionun ən böyük süni intellekt əsaslı Dil Mükəmməlliyi Laboratoriyası açılıb

Mingəçevir Dövlət Universitetində (MDU) süni intellekt texnologiyalarına əsaslanan “MSU Language Excellence Laboratory” – Dil Mükəmməlliyi Laboratoriyasının açılışı keçirilib. Laboratoriya sentyabrın 15-də, Bilik Günü münasibətilə fəaliyyətə başlayıb və regionda dil tədrisi və qiymətləndirilməsi sahəsində süni intellekt imkanlarından istifadə edən ən böyük laboratoriya kimi təqdim olunur. Açılış mərasimində Mingəçevir Şəhər İcra Hakimiyyətinin başçısı İlham İsmayılov, Milli Məclisin deputatı Aydın Mirzəzadə, MDU-nun rektoru Anar Eminov və digər şəhər rəsmiləri iştirak ediblər.

24media.az xəbər verir ki, laboratoriyanın fəaliyyət mexanizmini təqdim edən MDU-nun Rəqəmsal inkişaf və informasiya texnologiyaları mərkəzinin müdiri Elçin Tağıyev yeni yaradılan mühitin tələbələrin danışıq, dinləmə, oxu, yazı, söz ehtiyatı və tələffüz bacarıqlarının süni intellekt əsaslı alətlər vasitəsilə qiymətləndirilməsinə, fərdi inkişaf dinamikasının izlənilməsinə və əldə olunan nəticələr əsasında fərdiləşdirilmiş öyrənmə imkanlarının formalaşdırılmasına xidmət edəcəyini bildirib.

Sistemdə Avropa dillərinin qiymətləndirilməsi üçün istifadə olunan “CEFR” meyarlarından yararlanılması nəzərdə tutulur. Bu, tələbələrin dil bacarıqlarında real irəliləyişin zamanla daha obyektiv şəkildə ölçülməsinə imkan verəcək. Əldə olunan nəticələr əsasında tələbələr üçün fərdiləşdirilmiş öyrənmə imkanlarının formalaşdırılması, onların ehtiyaclarına uyğun tədris yanaşmalarının müəyyənləşdirilməsi planlaşdırılır.

Bildirilib ki, laboratoriyanın imkanları yalnız tələbələrin qiymətləndirilməsi ilə məhdudlaşmır. Süni intellekt platforması dərslərin video qeydlərini, sillabusları və digər tədris materiallarını təhlil edərək dərsin keyfiyyət göstəricilərini müəyyənləşdirəcək, həftəlik analizlərin nəticələrini hesabat formasında təqdim edəcək və müəllimlərə tədris prosesinin təkmilləşdirilməsi, eləcə də peşəkar inkişaf istiqamətləri üzrə konkret tövsiyələr verəcək.

Layihənin hazırda xarici dillər üzrə tədris olunan fənlərdən tətbiqinə başlanılıb və 2027-ci ilin martınadək MDU-nun əsas tədris binasında yerləşən bütün auditoriyalarda istifadəyə verilməsi planlaşdırılır. Universitetin yeni inkişaf strategiyasının tərkib hissəsi olan laboratoriyanın yaradılmasında məqsəd tədrisin keyfiyyətinin yüksəldilməsi, dərslərin obyektiv və sistemli şəkildə təhlili, tələbələrin fərdi inkişafının davamlı izlənilməsi və müəllimlərin peşəkar inkişafının dəstəklənməsidir.

Layihə çərçivəsində istifadə olunan proqram təminatının ABŞ, Kanada və Türkiyənin bir sıra qabaqcıl ali təhsil müəssisələrində tətbiq edildiyi bildirilir. Texnoloji infrastrukturda İsveçin “AXIS Communications” şirkətinin ağıllı audio, süni intellekt analitikası və inteqrasiya olunmuş rəqəmsal sistemlərə dair həllərindən də istifadə edilir. Laboratoriyada tətbiq olunan “edge computing” yanaşması məlumatların yarandığı qurğu səviyyəsində emalına imkan verir ki, bu da böyük həcmdə xam audio məlumatların daimi saxlanmasına ehtiyacı azaldır və məlumatların daha səmərəli və təhlükəsiz idarə olunmasına şərait yaradır.

Həvva Cəbrayılova

Rektor Anar Eminov 626 balla MDU-ya qəbul olunan tələbə ilə görüşüb

Mingəçevir Dövlət Universitetinin (MDU) rektoru Anar Eminov 626 bal toplayaraq Riyaziyyat müəllimliyi ixtisasına qəbul olunan Aysu İsmayılova və onun valideynləri ilə görüşüb.

24media.az xəbər verir ki avqustun 26-da baş tutan görüşdə rektor yüksək nəticə göstərərək universitetə qəbul olunan Aysu İsmayılovanı təbrik edib, yeni tədris ilində ona uğurlar arzulayıb.

Anar Eminov 626 ballıq nəticənin gənc tələbənin bilik və potensialının göstəricisi olduğunu bildirərək, bunun universitet həyatında daha böyük nailiyyətlər üçün yaxşı başlanğıc olduğunu vurğulayıb.

Rektor tələbənin müəllimlik ixtisasını seçməsini də yüksək qiymətləndirib. O, gələcəkdə Aysu İsmayılovanın peşəsinə sevgi ilə yanaşan, müasir bilik və bacarıqlara yiyələnən, şagirdlərinin inkişafına töhfə verən nümunəvi müəllim kimi formalaşmasının vacibliyini qeyd edib.

Görüşdə tələbələrin akademik biliklərlə yanaşı, müxtəlif elmi, sosial, mədəni və ictimai layihələrdə iştirak etmələri üçün universitetdə yaradılan imkanlardan da söz açılıb. Rektor yeni tələbəni universitet həyatında fəal olmağa və təqdim olunan imkanlardan səmərəli yararlanmağa çağırıb.

Aysu İsmayılova isə göstərilən diqqətə görə təşəkkürünü bildirib və MDU-nun tələbəsi olmaqdan məmnunluğunu ifadə edib. O, universitetdə yüksək nəticələr göstərmək, ixtisası üzrə biliklərini inkişaf etdirmək və tələbə həyatında fəal iştirak etmək əzmində olduğunu deyib.

Tələbənin valideynləri də övladlarının yüksək nəticə göstərməsindən və MDU-ya qəbulundan məmnunluqlarını ifadə edərək universitet rəhbərliyinin göstərdiyi diqqət və səmimi münasibətə görə təşəkkür ediblər.

Həvva Cəbrayılova

MDU-da turizm təhsilinin inkişafı üçün yeni imkanlar açılır

Azərbaycan Respublikasının Prezidenti İlham Əliyevin 20 avqust 2026-cı il tarixli Sərəncamı ilə təsdiq edilən “Azərbaycan Respublikasında turizmin inkişafına dair 2026–2030-cu illər üçün Dövlət Proqramı” ölkəmizdə turizm sektorunun inkişafında yeni strateji mərhələnin əsasını qoyur.

24media.az xəbər verir ki, bu barədə Mingəçevir Dövlət Universitetinin rektoru Anar Eminov bildirib. O qeyd edib ki, Dövlət Proqramı turizmin ölkənin sosial-iqtisadi inkişafındakı rolunun gücləndirilməsini, qeyri-neft-qaz iqtisadiyyatının şaxələndirilməsini, regionların rəqabət qabiliyyətinin artırılmasını və Azərbaycanın beynəlxalq turizm məkanı kimi mövqeyinin möhkəmləndirilməsini nəzərdə tutur.

"Bu sənəd turizmə yalnız səfərlərin və turist sayının artırılması prizmasından yanaşmır. Burada regionların inkişafı, insan kapitalı, elm və təhsil, rəqəmsallaşma, innovasiya, investisiya, nəqliyyat, xidmət keyfiyyəti və yerli icmaların iqtisadi proseslərə inteqrasiyası vahid turizm ekosisteminin tərkib hissələri kimi nəzərdən keçirilir. Məhz bu yanaşma regional universitetlərin, xüsusilə turizm istiqamətində kadr hazırlığı həyata keçirən ali təhsil müəssisələrinin qarşısında yeni fəaliyyət imkanları açır" , - deyə rektor qeyd edib.

Bildirilib ki, hazırda MDU-da turizm istiqaməti üzrə bakalavriat və magistratura səviyyələrində kadr hazırlığı həyata keçirilir. 2026/2027-ci tədris ilindən isə universitet tarixində ilk dəfə “Turizm işinin təşkili” ixtisası üzrə bakalavriat səviyyəsində ingilis dilində tələbə qəbulu planlaşdırılır.

Anar Eminovun sözlərinə görə, Türkiyənin tərəfdaş universitetlərinin akademik və metodiki dəstəyi ilə MDU-da Turizm kafedrasının yaradılması nəzərdə tutulur. Həmçinin Türkiyə universitetləri ilə əməkdaşlıq çərçivəsində turizm üzrə doktorantların hazırlanması, birgə elmi rəhbərlik mexanizmlərinin formalaşdırılması və ortaq tədqiqatların aparılması istiqamətində işlərin görülməsi planlaşdırılır.

Bu istiqamətdə Türkiyənin Dokuz Eylül Universitetindən turizm sahəsi üzrə professorun MDU-nun akademik fəaliyyətinə cəlb edilməsi də nəzərdə tutulur.

Qeyd olunub ki, Dövlət Proqramında turizm sahəsinə aid təhsil proqramlarının beynəlxalq standartlara və əmək bazarının tələblərinə uyğunlaşdırılması mühüm hədəflərdən biri kimi müəyyənləşdirilib. 2026–2030-cu illər ərzində mövcud təhsil proqramlarının 30 faizinin bu istiqamətdə yenilənməsi nəzərdə tutulur.

Bu hədəfin MDU üçün turizm üzrə mövcud bakalavriat və magistratura proqramlarının daha geniş şəkildə beynəlxalq təcrübə əsasında yenilənməsi üçün mühüm çərçivə yaradacağı, təhsil proqramlarında turizm marketinqi, destinasiya menecmenti, rəqəmsal turizm, hotel və qonaqpərvərlik menecmenti, turizm sahibkarlığı, xarici dillər, tədbirlərin idarə olunması, data analitikası, dayanıqlı turizm və müştəri təcrübəsinin idarə edilməsi kimi istiqamətlərinin daha geniş inteqrasiyasının mümkün ola biləcəyi vurğulanıb.

Bununla yanaşı, MDU-nun turizm şirkətləri, hotellər, yerləşmə və iaşə obyektləri, tədbir təşkilatçıları, yerli sahibkarlar və aidiyyəti dövlət qurumları ilə əməkdaşlığı genişləndirərək tələbələrin praktiki hazırlığını gücləndirməsi planlaşdırılır.

Dövlət Proqramının regional inkişaf istiqamətinin Mingəçevir və Mərkəzi Aranın turizm potensialının daha geniş araşdırılması üçün də imkan yaratdığı bildirilib. Kür çayı, Mingəçevir su anbarı, şəhərin idman və rekreasiya infrastrukturu, eləcə də coğrafi mövqeyi yeni turizm məhsullarının və marşrutlarının hazırlanması üçün potensial kimi qiymətləndirilib.

Eyni zamanda, MDU-nun Mərkəzi Aranda turizm potensialına malik yaşayış məntəqələrinin araşdırılması, yerli resursların inventarlaşdırılması, icma əsaslı turizm modellərinin hazırlanması və kənd sahibkarları üçün təlimlərin təşkili istiqamətində fəaliyyət göstərə biləcəyi vurğulanıb.

Bildirilib ki, turizmin rəqəmsallaşması da qarşıdakı dövrün əsas istiqamətlərindən biridir. Dövlət Proqramında Turizm İnformasiya Sisteminin yaradılması, “Rəqəmsal turizm destinasiyası” layihəsinin həyata keçirilməsi, turizm obyektləri üzrə audiobələdçilərin hazırlanması və innovasiya ekosisteminin formalaşdırılması nəzərdə tutulur.

Anar Eminov vurğulayıb ki, MDU-da turizmin informasiya texnologiyaları, kompüter elmləri, marketinq, biznesin idarə edilməsi və data analitikası ilə əlaqələndirilməsi üçün geniş imkanlar yaranır. Bu çərçivədə Mingəçevir üçün rəqəmsal turizm xəritəsinin, çoxdilli audiobələdçilərin, virtual turların və turistlər üçün müxtəlif rəqəmsal həllərin hazırlanması mümkün ola bilər.

Qeyd olunub ki, Dövlət Proqramında turizm üçün xarakterik sahələrdə yaradılan əlavə dəyərin 2025-ci ildəki 6,96 milyard manatdan 2030-cu ildə 12,17 milyard manata yüksəldilməsi hədəflənir. Eyni zamanda, bu sahələrin qeyri-neft-qaz ÜDM-də payının 8,6 faizə çatdırılması və Azərbaycana səfər edən əcnəbi və vətəndaşlığı olmayan şəxslərin sayının təxminən 3,8 milyon nəfərə yüksəldilməsi nəzərdə tutulur.

Rektorun sözlərinə görə, turizm sektorunun genişlənməsi ixtisaslı kadrlara tələbatı da artıracaq. Bu səbəbdən universitetlərin qarşısında yalnız mövcud əmək bazarı üçün deyil, gələcək illərin turizm sənayesi üçün də mütəxəssis hazırlamaq vəzifəsi dayanır.

Anar Eminov bildirib ki, MDU-da ingilis dilində turizm təhsilinin təşkili, yeni Turizm kafedrasının yaradılması, doktorant hazırlığının inkişafı, beynəlxalq əməkdaşlığın genişləndirilməsi, tətbiqi tədqiqatların və rəqəmsal turizm layihələrinin artırılması universitetin bu sahədə mövqeyinin güclənməsinə töhfə verə bilər.

Həvva Cəbrayılova

MDU ali təhsil müəssisələrinin sərgisində təmsil olunur

29–31 iyul tarixlərində Dövlət İmtahan Mərkəzində təşkil olunan ali təhsil müəssisələrinin sərgisində Mingəçevir Dövlət Universiteti (MDU) öz stendi ilə təmsil olunur.

24media.az xəbər verir ki, sərgi iştirakçılarına MDU-da tələbəyönümlü tədris mühiti, beynəlxalq əməkdaşlıq imkanları, praktiki bacarıqların inkişafına xidmət edən proqramlar və akademik dəstək mexanizmləri barədə məlumat verilib. Universitet nümayəndələri abituriyent və valideynlərin ixtisas seçimi, qəbul prosesi və gələcək karyera perspektivləri ilə bağlı suallarını cavablandırıblar.

Keçirilən xüsusi infosessiyada bakalavriat və magistratura səviyyələri üzrə ixtisaslar, ingilis dilində təhsil imkanları, ikili diplom və tələbə mübadiləsi proqramları haqqında ətraflı məlumat verilib.

MDU-nun sərgidə iştirakı abituriyentlərin məqsədyönlü ixtisas seçiminə dəstək göstərmək və müasir təhsil imkanlarını geniş ictimaiyyətə çatdırmaq amacı daşıyır. Sərgi iyulun 31-dək davam edəcək.

Həvva Cəbrayılova

Şuşada IV Beynəlxalq Elmi Araşdırmalar Konqresi işə başlayıb

İyulun 23-də Şuşa şəhərində IV Beynəlxalq Elmi Araşdırmalar Konqresinin açılış mərasimi keçirilib. 23–25 iyul tarixlərini əhatə edən tədbir İqtisadi Elmi Tədqiqat İnstitutu, Mingəçevir Dövlət Universiteti (MDU), Naxçıvan Dövlət Universiteti, İ.Razzakov adına Qırğızıstan Dövlət Texniki Universiteti, UNEC-in İqtisadi Araşdırmalar Elmi-Tədqiqat İnstitutu və İKSAD İnstitutunun birgə təşkilatçılığı ilə hibrid formatda təşkil olunub.

24media.az xəbər verir ki, beynəlxalq konfransda Azərbaycanla yanaşı Türkiyə, Qazaxıstan, Qırğızıstan, Polşa, İtaliya, Latviya, İran, Səudiyyə Ərəbistanı, Kosovo, Nigeriya, Rusiya, ABŞ, Albaniya və Çindən olan tədqiqatçılar iştirak edirlər.

Tədbirin açılışında İqtisadi Elmi Tədqiqat İnstitutunun İdarə Heyətinin sədri Şahin Sadıqov, MDU rektoru Anar Eminov, Qırğızıstan Dövlət Texniki Universitetinin nümayəndəsi Çinarə Asanbekova və İKSAD-ın Azərbaycan üzrə baş direktoru Əlvan Cəfərov çıxış edərək konqresin akademik əlaqələrin genişlənməsində, Qarabağ və Şərqi Zəngəzurun inkişafı, rəqəmsal transformasiya, yaşıl iqtisadiyyat və süni intellekt kimi aktual istiqamətlərdə yeni elmi yanaşmaların ortaya qoyulmasında mühüm rolunu vurğulayıblar. Həmçinin İKSAD İnstitutunun baş direktoru Mustafa Latif Ekmek tədbir iştirakçılarına videomüraciət ünvanlayıb.

Açılış nitqlərindən sonra professor Arzu Hüseynova və professor Şəfa Əliyev plenar məruzələrlə çıxış ediblər. Konfrans öz işini iqtisadiyyat, təhsil, IT, süni intellekt, ekologiya, tarix, dilçilik və sosial elmlər üzrə bölmə iclasları ilə iyulun 25-dək davam etdirəcək.

Həvva Cəbrayılova

"Magistr” jurnalının 4-cü nömrəsi nəşr edilib

Dövlət İmtahan Mərkəzi (DİM) “Magistr” jurnalının 4-cü nömrəsini nəşr edib.

24media.az "AZƏRTAC"a istinadən bildirir ki, jurnalın bu nömrəsində 2026/2027-ci tədris ili üçün Azərbaycan Respublikasının ali təhsil müəssisələrinin magistraturalarına qəbul üzrə ixtisaslaşma seçimi ilə bağlı elan dərc olunub.

Nəşrdə, həmçinin “Bakalavrın elektron ərizəsi”ndə ixtisaslaşmaların seçilməsi və təsdiqi qaydaları, müsabiqə şərtləri, ali təhsil müəssisələrinin magistraturalarına qəbul aparılan ixtisaslaşmalar üzrə ümumi qəbul planı və dövlət sifarişi əsasında qəbulun proqnozu yer alıb.

Qeyd edilib ki, həm Azərbaycan, həm də rus bölməsi üzrə qəbul elanı və qəbul planı vahid jurnalda Azərbaycan dilində təqdim olunub.

“Magistr” jurnalını DİM-in inzibati binasından, “Abituriyent” satış məntəqəsindən, eləcə də kitab mağazalarından əldə etmək mümkündür. Jurnalı, həmçinin abiturient.az saytı və Wolt tətbiqi vasitəsilə sifariş etmək olar.

“Magistr” jurnalının 4-cü nömrəsinin elektron versiyası (PDF formatında) də www.abiturient.az saytında yerləşdirilib.

Hazırladı: Nuray Mürsəlova

Mingəçevir Dövlət Universiteti “sıfır tullantı” modelinin tətbiqi üçün Türkiyənin Sıfır Atık Vakfı ilə əməkdaşlıq imkanlarını müzakirə edib

2026-cı ilin 17 iyul tarixində Mingəçevir Dövlət Universitetinin rektoru Anar Eminovun rəhbərlik etdiyi nümayəndə heyəti Türkiyə Respublikasına rəsmi səfər çərçivəsində Sıfır Atık Vakfında olub.

24media.az xəbər verir ki, MDU-nun nümayəndə heyətini Sıfır Atık Vakfının Mütevelli Heyəti və İdarə Heyətinin sədri Samed Ağırbaş qəbul edib.

Görüşün əsas məqsədi tullantıların yaranmasının qarşısının alınması və azaldılması, karbon emissiyasının minimuma endirilməsi, təbii resurslardan səmərəli istifadə, təkrar emal mədəniyyətinin inkişaf etdirilməsi və dairəvi iqtisadiyyat prinsiplərinin universitet mühitində tətbiqi istiqamətində Fondun beynəlxalq təcrübəsindən, metodoloji yanaşmalarından və institusional əməkdaşlıq imkanlarından faydalanmaq olub.

Görüşdə MDU-nun nəzdində fəaliyyət göstərən Davamlı Enerji və Mühəndislik Sistemləri Tədqiqatları İnstitutunun xətti ilə sıfır tullantı modelinin formalaşdırılması, kampus ərazisində tullantıların çeşidlənməsi və idarə olunması sisteminin təkmilləşdirilməsi, enerji və su resurslarından qənaətlə istifadə, karbon izinin ölçülməsi və azaldılması, ekoloji göstəricilərin monitorinqi, eləcə də tələbə və əməkdaşların ekoloji təşəbbüslərə cəlb edilməsi məsələləri müzakirə olunub.

Tərəflər universitet kampusunda sıfır tullantı yanaşmasının mərhələli şəkildə tətbiqi, birgə layihə və maarifləndirici proqramların, təlimlərin və seminarların təşkili, ekoloji layihələrin hazırlanması, müvafiq təcrübə və məlumat mübadiləsinin həyata keçirilməsi imkanları barədə fikir mübadiləsi aparıblar.

Rektor Anar Eminov Mingəçevir Dövlət Universitetində həyata keçirilən institusional inkişaf prosesində ekoloji məsuliyyətin və resursların səmərəli idarə edilməsinin əsas istiqamətlərdən biri olduğunu bildirib. Rektor qeyd edib ki, universitetdə tullantıların idarə olunması, enerji səmərəliliyinin artırılması, karbon izinin azaldılması və ekoloji davranış mədəniyyətinin formalaşdırılması ilə bağlı təşəbbüslərin vahid sistem əsasında həyata keçirilməsi nəzərdə tutulur.

Anar Eminov Sıfır Atık Vakfının bu sahədə formalaşdırdığı təcrübənin öyrənilməsinin Mingəçevir Dövlət Universitetində ölçülə bilən ekoloji göstəricilərə əsaslanan idarəetmə mexanizmlərinin qurulmasına, kampus infrastrukturunun təkmilləşdirilməsinə və tələbələrin yaşıl bacarıqlarının inkişafına mühüm töhfə verəcəyini diqqətə çatdırıb.

Sıfır Atık Vakfının sədri Samed Ağırbaş Mingəçevir Dövlət Universiteti ilə birgə layihələrin yaxın gələcəkdə icrasının mümkünlüyünə əminliyini bildirib. O, gənclərin ekoloji məsuliyyət, şüurlu istehlak və resurslardan səmərəli istifadə prinsipləri əsasında yetişdirilməsinin uzunmüddətli nəticələr yaratdığını qeyd edərək, Mingəçevir Dövlət Universitetinin bu istiqamətdə nümayiş etdirdiyi təşəbbüskarlığı yüksək qiymətləndirib.

Qeyd edək ki, Mingəçevir Dövlət Universiteti Azərbaycan universitetləri arasında ilk dəfə olaraq sıfır tullantı modeli üzrə Sıfır Atık Vakfı ilə birbaşa institusional əməkdaşlıq imkanlarının müzakirəsinə başlayıb. Bu təşəbbüs universitetdə ekoloji idarəetmənin beynəlxalq təcrübə əsasında təkmilləşdirilməsi, kampusun resurs səmərəliliyinin artırılması və ətraf mühitə təsirin ölçülə bilən göstəricilər əsasında azaldılması baxımından yeni mərhələnin əsasını qoyur.