“Virgin” şirkəti “Eurostar”a rəqib olmağa hazırlaşır

“Virgin” şirkəti 2030-cu ildə Londondan Avropa qitəsinə sərnişin daşımalarına başlamağı planlaşdırıb. Şirkət yeni qatarların dizaynı və xidmət keyfiyyəti ilə rəqibi “Eurostar”ı geridə qoymağa çalışacaq.

“Virgin” şirkəti gələcəkdə istifadəyə verəcəyi La-Manş boğazından keçən qatarın maketini təqdim edib. Şirkət yeni layihə vasitəsilə sərnişinlərə fərqli səyahət təcrübəsi təqdim etməyi hədəfləyib.

Şirkət qatarların istehsalı üçün Fransanın “Alstom” şirkətinə 12 qatar sifariş edib. Yeni qatarların dizaynı və sərnişinlərə göstəriləcək xidmətlər baxımından “Eurostar”la rəqabət aparması nəzərdə tutulur.

“Virgin” şirkətinin Böyük Britaniyada dəmir yolu nəqliyyatını yeniləmək istiqamətində əvvəlki təşəbbüslərindən biri 2013-cü ildə şəhərlərarası qatarlarda danışan tualet oturacağının tətbiqi ilə yadda qalıb. Şirkət yeni qatarların hazırlanmasında aviasiya, kruiz və hotelçilik sahələrindəki təcrübəsindən yararlanacağını bildirib.

Layihənin təfərrüatları hələlik açıqlanmayıb. Bununla belə, şirkət “Virgin Atlantic” aviaşirkətinin hava limanlarında sərnişinlər üçün nəzərdə tutulan “Clubhouse” istirahət salonlarının təcrübəsindən istifadə etməyi planlaşdırır. Məqsəd yola düşməzdən əvvəl və səfər zamanı sərnişinlərin işləyə, dincələ və ünsiyyət qura biləcəyi rahat məkanlar yaratmaqdır.

Qatarlarda təqdim olunacaq yeməklərin “Virgin” şirkətinin kruiz gəmilərindəki menyulardan, interyer dizaynının isə “Virgin Hotels” hotelçilik brendindən ilhamlanacağı bildirilib.

“Virgin” şirkətinin Londonla Avropa qitəsi arasında yeni dəmir yolu xidmətlərinə 2030-cu ildə başlaması nəzərdə tutulur. Bu, La-Manş tunelinin açılışından sonra “Eurostar” üçün ilk ciddi rəqabət mərhələsi olacaq.

Mənbə:The Guardian

Tərcümə etdi:Fərid Tapdıqov

Roma hava limanlarından Aİ-yə xəbərdarlıq

Roma hava limanlarının rəhbərliyi Avropa İttifaqının yeni rəqəmsal sərhəd nəzarəti sisteminin yay turizm mövsümündə ciddi problemlər yarada biləcəyi barədə xəbərdarlıq edib. Bildirilib ki, sərnişin sıxlığının və uzun növbələrin qarşısını almaq üçün sistemin tətbiqi müvəqqəti dayandırılmalıdır.

Romanın hava limanlarını idarə edən şirkətin baş icraçı direktoru Marko Tronkone bildirib ki, Avropa İttifaqının yeni Giriş-Çıxış Sisteminin (EES) yay aylarında tam tətbiqi hava limanlarında xaosa səbəb ola bilər.

Onun sözlərinə görə, Avropa İttifaqına daxil olan üçüncü ölkə vətəndaşlarının yeni biometrik prosedurdan keçmədən sərhədi adlamasına imkan verilməsi pik turizm mövsümündə yaranacaq problemlərin qarşısını almağın yeganə yoludur. Marko Tronkone qeyd edib ki, Avropanın digər hava limanlarının rəhbərləri də oxşar narahatlıqları ifadə ediblər.

Yeni qaydalara əsasən, Avropa İttifaqına ilk dəfə daxil olan üçüncü ölkə vətəndaşlarından, o cümlədən Böyük Britaniya vətəndaşlarından barmaq izləri və üz görüntüləri götürülür. Sistem birliyin xarici sərhədlərinə nəzarətin gücləndirilməsi məqsədilə yaradılıb.

Giriş-Çıxış Sistemi ötən ilin oktyabrında istifadəyə verilib, sonrakı gecikmələrdən artıq bu ilin aprel ayının ortalarında tam şəkildə tətbiq olunmağa başlanıb.

Lakin texniki problemlər səbəbindən sistemin fəaliyyəti çətinliklərlə müşayiət olunub. Nəticədə hava limanlarında uzun növbələr yaranıb, bəzi sərnişinlər isə uçuşlarını buraxıblar.

Yay mövsümündə sərnişin axınının daha da artacağı gözlənildiyindən, hava limanları rəhbərliyi mövcud vəziyyətin daha ciddi problemlərə səbəb ola biləcəyini vurğulayıb.

Mənbə: The Guardian

Tərcümə etdi: Fərid Tapdıqov

İspaniyada turist sayı 100 milyona yaxınlaşır

İspaniya turizm sektorunda artım tempini davam etdirərək xarici turist sayının 100 milyona yaxınlaşdığını bildirib. Rəsmilər bu artımı problem kimi yox, idarəolunan inkişaf kimi qiymətləndiriblər.

İspaniya turizm naziri Jordi Hereu bildirib ki, ölkə ənənəvi “günəş, dəniz və sahil” modelindən tədricən uzaqlaşaraq daha az tanınan regionların və mövsümdənkənar turizmin inkişafına üstünlük verib.

Onun sözlərinə görə, bu il İspaniyaya gələn xarici turistlərin sayı 100 milyon nəfərə çata bilər və bu göstərici hökumət üçün narahatlıq yaratmır. Nazir qeyd edib ki, əsas məqsəd “sakit artım” adlanan, yəni idarəolunan və davamlı inkişaf modelinə nail olub.

Rəqəmlərə əsasən, ötən il İspaniyaya gələn xarici turistlərin sayı 3,2 faiz artaraq 96,8 milyon nəfərə çatıb, turistlərin xərcləri isə 6,8 faiz artaraq 134 milyard avro təşkil edib.

Cari ilin ilk rübündə isə turist sayı 3,4 faiz, gəlirlər isə 6,7 faiz artım göstərib.

Jordi Hereu əlavə edib ki, qlobal geosiyasi və iqtisadi qeyri-müəyyənliklər bəzi istiqamətlərdən turist axınının İspaniyaya yönəlməsinə səbəb ola bilər, lakin ümumi proqnozlar mülayim artım ssenarisini göstərir.

Mənbə: The Guardian

Tərcümə etdi: Fərid Tapdıqov

Artemis missiyasının əhəmiyyəti

NASA-nın Artemis proqramı insanlığı yenidən Aya qaytarmağı və gələcəkdə Marsa çatmağı hədəfləyir. Artemis II missiyası ilə astronavtlar Ay ətrafında uçuş həyata keçirəcək. Bu proqram uzun illərin zəhməti və böyük maliyyə nəticəsində reallaşıb.

Ay zəngin təbii resurslara, o cümlədən nadir elementlərə və buz halında su ehtiyatlarına malikdir. Bu resurslar həm kosmosda yaşam, həm də texnoloji inkişaf üçün mühüm əhəmiyyət daşıyır. Eyni zamanda Ay, Marsa uçuşdan əvvəl texnologiyaların sınaqdan keçirilməsi üçün ən uyğun məkandır. Artemis proqramı həm elmi kəşflər, həm də kosmosda liderlik uğrunda rəqabət baxımından vacibdir. Bu missiyalar insanlığın Marsa gedən yolunu daha təhlükəsiz edəcəyi düşünülür. Həmçinin, bu layihə yeni nəsildə elm və texnologiyaya marağı artırması hədəflənib.

Mənbə: TRT Haber

Tərcümə etdi: Fidan Mənsimova

İran: "ABŞ ilə müvəqqəti saziş iddialarının heç bir əsası yoxdur"

İran Xarici İşlər Nazirliyinin sözçüsü İsmayıl Bekayi ABŞ ilə danışıqlarda "müvəqqəti saziş" iddiaları ilə bağlı açıqlamasında bildirib ki, "Biz bu cür şərhləri təsdiqləmirik. (ABŞ ilə) Müvəqqəti saziş iddialarının heç bir əsası yoxdur."

Bekayi bu sözləri Tehranda keçirdiyi həftəlik mətbuat konfransında deyib.

O, ABŞ ilə danışıqların məzmunu ilə bağlı çoxsaylı iddiaların irəli sürüldüyünü bildirib və əlavə edib ki, "Biz bu cür şərhləri təsdiqləmirik. Müvəqqəti saziş iddialarının heç bir əsası yoxdur."

Bekayi danışıqlar mətninin hazırlanmasının birgə proses olduğunu vurğulayıb və İranın ABŞ sanksiyalarının ləğvi ilə bağlı mövqeyinin aydın olduğunu bildirib.

ABŞ Prezidenti Donald Trampın Yaxın Şərq üzrə xüsusi nümayəndəsi Stiv Vitkoffun "İranın bir həftə ərzində nüvə silahı istehsal etmək üçün materiallara sahib olacağı" açıqlaması ilə bağlı Bekayi deyib: "Bu cür ifadələrlə ilk dəfə rastlaşmırıq."

Bekayi həmçinin danışıqların qərəz və məcburiyyətlə uğur qazana bilməyəcəyini bildirərək dedi: "Bu yanaşma İran üçün nəticə verməyəcək. Biz ciddi şəkildə diplomatiya yolu ilə hərəkət edirik. Ölkəmizin hüquqlarını təmin edən, nüvə məsələlərini və sanksiyaların ləğvini əhatə edən bir razılaşmanı qəbul edə bilərik".

Mümkün müharibə halında İranın bütün hücumlara cavab verəcəyini vurğulayan Bekayi dedi: "Qüvvələrimiz ölkəmizi müdafiə etmək üçün 24 saat hazırlıq vəziyyətindədir".

Nəhayət, İran Ali Milli Təhlükəsizlik Şurasının katibi Əli Laricaninin 24 fevral çərşənbə axşamı günü Omana səfər edib-etməyəcəyi ilə bağlı suala Bekayi cavab verdi: "Bu məsələni təsdiqləməliyəm; hazırda heç bir məlumatım yoxdur".

https://share.google/djM8TjFmaTh2fnrM1

Mənbə: TRT Haber

Tərcümə etdi: Piranə Xasiyeva

Dubay hava limanı ötən il sərnişin daşınmasında tarixi rekorda imza atıb

Dubay Beynəlxalq Hava Limanı 2025-ci ildə 95,2 milyon sərnişinə xidmət göstərərək tarixinin ən yüksək illik göstəricisinə imza atıb. Bu, ötən illə müqayisədə 3,1 faiz artım deməkdir.

24media.az bildirir ki, AZƏRTAC WAM informasiya agentliyinə istinadla xəbər yayıb. Qeyd olunub ki, 2025-ci ildə 454 min 800 uçuş həyata keçirilib, 86,75 milyon baqaj emal olunub.

Hazırda Dubay Beynəlxalq Hava Limanı 110 ölkədə 291 istiqamətə uçuşlar həyata keçirir.

Amina Paşazadə

AZAL Naxçıvana səfərləri əvvəlcədən planlaşdırmağı tövsiyə edir

Novruz və Ramazan bayramları ərəfəsində, xüsusilə də bayram günlərində Bakı–Naxçıvan–Bakı marşrutu üzrə hava daşımalarına tələbat ənənəvi olaraq artır. Bu səbəbdən, Azərbaycanın milli aviadaşıyıcısı AZAL qeyd olunan dövrdə bu istiqamətdə səyahət etməyi planlaşdıran sərnişinlərə aviabiletləri əvvəlcədən əldə etməyi tövsiyə edir.

24media.az “APA-Economics”ə istinadən xəbər verir ki, hazırda qüvvədə olan uçuş cədvəlinə əsasən, bayramlar ərəfəsində və istirahət günlərində Bakı–Naxçıvan–Bakı marşrutu üzrə gün ərzində 8–10 müntəzəm reysin (gediş-gəliş 16–20 reys) yerinə yetirilməsi planlaşdırılıb. Zərurət yarandığı halda tələbata uyğun olaraq uçuşların sayının daha da artırılması nəzərdə tutulur. Beləliklə, Naxçıvan istiqamətində hava nəqliyyatı əlaqəsinin müntəzəmliyi və fasiləsizliyi planlama zamanı əsas götürülür.

Amina Paşazadə

"Alov Qüllələri" – Bakının qəlbindəki ocaq

Bakıya uzaqdan baxdıqda diqqəti cəlb edən elementlərdən biri də məhz "Alov Qüllələri"dir. Bakı şəhərinin səmasını bəzəyən qüllələr təkcə müasir memarlıq nümunəsi deyil, Azərbaycanın milli kimliyi, qlobal imicidir. Bəs "Alov qüllələri" nəyi təmsil edir, kimlər üçün inşa edilib?

Azərbaycan tarixində “od” anlayışı yalnız fiziki element deyil, fəlsəfi və mədəni məna daşıyır. Zərdüştlük dövründən etibarən od müqəddəs sayılıb. Abşeron yarımadasında torpaqdan çıxan təbii alovlar bu inancların formalaşmasında mühüm rol oynayıb. “Odlar Yurdu” ifadəsi təsadüfi deyil, bu torpağın kimliyi ilə birbaşa bağlıdır.

ABŞ-nin tanınmış HOK memarlıq şirkəti tərəfindən dizayn edilən kompleks od anlayışını metaforik və vizual dildə təqdim edir. Burada məqsəd təkcə estetik təsir yaratmaq deyil, Bakının keçmişini gələcək texnologiyalarla birləşdirən memarlıq dili formalaşdırmaq olub.

Kompleks üç qüllədən ibarətdir. Bir çox tədqiqatçılar bu üçlüyü keçmiş–indiki zaman–gələcək, yaxud mədəniyyət–iqtisadiyyat–dövlətçilik kimi görürlər. Funksional baxımdan isə qüllələrdən biri yaşayış binası, digəri beşulduzlu otel, üçüncüsü isə ofis mərkəzi kimi nəzərdə tutulub. Yəni, Alov Qüllələri yalnız simvol deyil, eyni zamanda Bakının biznes, turizm və şəhər həyatının aktiv bir hissəsi olmaq üçün inşa edilib.

“Kimlər üçün inşa edilib?” sualına cavab çoxqatlıdır. Bir tərəfdən bu kompleks yerli əhali üçün milli qürur mənbəyi, Bakının müasir simasıdır. Digər tərəfdən isə xarici investorlar, turistlər və beynəlxalq ictimaiyyət üçün güclü vizual mesajdır: Azərbaycan qlobal memarlıq dilində danışa bilən, müasirliklə köklərini sintez edən bir ölkədir.

Qüllələrin şəhər panoramasındakı mövqeyi də mühüm məna daşıyır. Onlar Bakının ən yüksək nöqtələrindən birində yerləşərək həm İçərişəhərə, həm də Xəzər dənizinə vizual baxış yaradır. Bu yerləşmə sanki tarixi mərkəzlə müasir şəhər arasında körpü rolunu oynayır. Aşağıda minillik daş divarlar, yuxarıda isə şüşə və poladdan ibarət siluet - bu kontrast Bakının özünün daxili ziddiyyətlərini və harmoniyasını əks etdirir.

Gecə saatlarında LED fasadların alov animasiyası ilə işıqlandırılması Alov Qüllələrini daha da simvolik edir. Bu işıqlandırma sadəcə estetik şou deyil, şəhərin gecə kimliyinin formalaşmasında mühüm rol oynayır. Bakı gecə vaxtı uzaqdan baxıldıqda alovlanan bir şəhər təəssüratı yaradır.

Memarlıq baxımından kompleks Azərbaycanın qlobal memarlıq sisteminə inteqrasiyasının göstəricisidir. HOK kimi beynəlxalq şirkətin layihəyə cəlb olunması Bakının dünya şəhərləri ilə eyni liqaya çıxmaq ambisiyasını ortaya qoyur.

Alov Qüllələri həm də neft sonrası dövr üçün düşünülmüş simvol kimi oxuna bilər. Neftdən əldə olunan gəlirlərin mədəniyyətə, şəhərsalmağa və imic quruculuğuna yönəldilməsi bu cür layihələrdə özünü göstərir. Yəni qüllələr yalnız mövcud gücün deyil, gələcəyə dair strategiyanın da ifadəsidir.

Alov Qüllələri konkret bir sosial qrup üçün deyil, çoxşaxəli auditoriya üçün inşa edilib: Azərbaycan vətəndaşı, xarici qonaq, investor, tarixçi, memar və sadə müşahidəçi üçün. Hər kəs bu qüllələrdə fərqli məna görə bilər. Məhz bu çoxmənalılıq onları güclü simvola çevirir.

Bu qüllələr Bakının səmada yazılan hekayəsi kimidir. Odla başlayan, modernliklə davam edən və gələcəyə yönələn bir hekayə. Onlar göstərir ki, memarlıq sadəcə bina tikmək deyil, kimlik yaratmaq, yaddaş formalaşdırmaq və dünyaya “biz buradayıq” deməyin ən səssiz, amma ən təsirli yoludur.

Talehə Hüseynzadə

Dünyanın ən gözəl kəndi - Mürren

Mürren İsveçrənin Alp dağlarında yerləşən, avtomobilsiz və çox sakit bir dağ kəndidir. Bu orta əsr kəndi uzun illər xarici aləmdən nisbətən təcrid olunmuş vəziyyətdə qalıb. Dünyanın ən dik kanat yolu açıldıqdan sonra Mürren vadidən cəmi bir neçə dəqiqəyə əlçatan olub.

Yeni Schilthorn kanat yolu kəndi vadi ilə birbaşa birləşdirərək nəqliyyatı və gündəlik həyatı xeyli asanlaşdırıb. Mürren həm qışda xizək mərkəzi, həm də yayda yürüş və paraşütlə uçuş üçün məşhur turizm məkanıdır. Kəndin güclü icma ruhu və təbii gözəlliyi onu gələn qonaqlar üçün unudulmaz edib.

Mürren yalnız bir turizm məkanı deyil, həm də təbiətlə harmoniyada qurulmuş həyat tərzinin nümunəsidir. Avtomobilsiz mühit və saf dağ havası insanlara sakitlik və azadlıq hissi bəxş edib. Bu kəndi tam anlamaq üçün onu görmək yox, yaşamaq lazımdır.

Tərcümə etdi: Fidan Mənsimova

Dünyanın ən maraqlı səyahət məkanları

BBC Travel 2026-cı il üçün dünyanın ən maraqlı səyahət məkanlarını təqdim edib. Siyahıya həm təbiəti, həm mədəniyyəti, həm də davamlı turizmi ilə seçilən yerlər daxildir. Bu istiqamətlər səyahətçilərə fərqli təcrübə və məsuliyyətli kəşf imkanı yaradıb.

Siyahıda Abu Dabi, Yaponiya, Şotlandiya, Çili və İndoneziya kimi ölkə və bölgələr xüsusi yer tutub. Bu məkanlar tarixi irsin qorunması, ekoloji layihələr və yerli icmaların dəstəklənməsi ilə diqqət çəkib. Eyni zamanda, yeni muzeylər, milli parklar və mədəni tədbirlər səyahətləri daha mənalı edib.

2026-cı ilin ən yaxşı səyahət yerləri təkcə istirahət deyil, öyrənmə və paylaşma fürsəti də yaradır. Bu istiqamətlərdə turizm həm təbiətə, həm də insanlara fayda verməyi hədəfləyib. Doğru seçimlə səyahət unudulmaz və müsbət təsirli bir təcrübəyə çevrilə bilər.

Mənbə: BBC NEWS

Tərcümə etdi: Fidan Mənsimova