Papa Leo ağciyər xərçəngi ilə bağlı əməliyyatından cəmi bir neçə gün sonra, cümə günü xəstəxanadan Rusiya Prezidenti Vladimir Putinlə telefonla danışıb. O, Rusiyanın işğalı altında olan Ukrayna şəhərindəki “ağır humanitar vəziyyətlə” bağlı narahatlığını ifadə edib.
24media.az BBC.news-a istinadən xəbər verir ki, Papa XIV Leo cümə günü Gemelli xəstəxanasının 10-cu mərtəbəsində bunun üçün hazırlanmış otaqda müqəddəs messanı qeyd edib.
Vatikanın məlumatına görə, telefon danışığı zamanı Papa Leo Xerson vilayətində yerləşən, Rusiyanın işğalı altında olan Oleşki şəhərindəki vəziyyətlə bağlı dərin narahatlığını bildirib. Ukrayna rəsmilərinin sözlərinə görə, şəhərdə təxminən 2000 mülki şəxs qalır, ərzaq və dərman təchizatı marşrutları isə bağlanıb.
Ukraynalıların kömək üçün müraciət etdiyi Papa Leo mülki əhalinin təhlükəsiz şəkildə təxliyə olunmasına və humanitar yardımın çatdırılmasına imkan yaratmaq üçün bölgədə atəşkəs elan edilməsinə çağırıb. Kremlin bəyanatında bildirilib ki, Putin Vatikanın ağır humanitar vəziyyətin yüngülləşdirilməsinə kömək etmək niyyətini dəstəkləyib. Ukrayna isə Rusiyanı Oleşkidə “qəsdən humanitar fəlakət yaratmaqda” ittiham edib.
Müqəddəs ayin xəstəxananın 10-cu mərtəbəsindəki otaqlardan birində keçirilib. Həmin mərtəbədə papanın tibbi müalicə üçün xəstəxanaya yerləşdirildiyi hallarda istifadə olunması üçün xüsusi otaqlar ayrılıb. Vatikan həmçinin bildirib ki, Papa Leo bazar günü ənənəvi Angelus duasını oxuyacaq. Bu, onun müalicəsindən sonra ilk ictimai çıxışı olacaq.
ABŞ Prezidenti Donald Tramp papanın qardaşı ilə danışdığını və ondan Leo üçün xoş arzularını çatdırmasını xahiş etdiyini deyib. “Onun tezliklə sağalmasını arzuladıq. Qardaşı ilə danışdım və dedim ki, ən xoş arzularımı ona çatdırsın”, - Tramp bildirib.
Vatikanın son məlumatına görə, Papa Leo cümə günü səhər qan analizlərindən keçib və döş qəfəsinin rentgen müayinəsi aparılıb. Onun müalicəsində iştirak edən həkimlər bildiriblər ki, pontifik tənəffüs fizioterapiyası seanslarını davam etdirir. Həkimlərin sözlərinə görə, sağalma prosesi ona gündəlik fəaliyyətlərini müstəqil şəkildə yerinə yetirməyə imkan verir.
Vatikan əlavə edib ki, 71 yaşlı papanın hazırda hərəkət etməsi və nəfəs alması üçün başqasının köməyinə ehtiyacı yoxdur. Papanın xərçəngdən tamamilə sağalıb-sağalmadığını və əlavə müalicəyə ehtiyac olub-olmadığını müəyyənləşdirmək üçün əməliyyatdan sonra aparılan müayinələrin nəticələri hələ açıqlanmayıb.
Papanın xərçəng diaqnozu alması xəbəri Vatikanda böyük təəccüblə qarşılanıb. Çünki Leo fiziki cəhətdən fəal, sağlam görünüşlü biri kimi tanınıb. Papanın oktyabrın 20-dək planlaşdırılan bütün tədbirləri ləğv edilib. Onun noyabrın 6-dan 17-dək Latın Amerikasına nəzərdə tutulan səfərinin baş tutub-tutmayacağı isə hələ məlum deyil. Bununla belə, Vatikan səfərlə bağlı hazırlıqları davam etdirir. Cümə günü qurum papanın səfərini işıqlandırmaq üçün onunla birlikdə yola düşəcək jurnalistlərin siyahısını dərc edib.
Banuçiçək Qurbanova
