Fransa şirkəti 2026-cı il noyabrın 1-dən etibarən Argos beynəlxalq sistemi vasitəsilə Rusiya təşkilatlarına xidmət göstərməyi dayandıracaq. Bu qərar vəhşi heyvanların hərəkətini izləmək üçün yeni sistemin yaradılmasını zəruri edib.
Foto: magnific.com
24Media.az kubnews.ru saytına istinadən xəbər verir ki, Argos sistemi quşların, quru və su məməlilərinin, o cümlədən Baykal nerpasının miqrasiyasını və davranışını öyrənməyə kömək edib. Məlumatlara çıxışın itirilməsi uzunmüddətli elmi tədqiqatlar və təbiətin mühafizəsi proqramları üçün çətinliklər yarada bilər.
Rusiyada heyvanların hərəkətini izləmək üçün sensorlar və xüsusi cihazlar istehsal olunur. Lakin onların ölçüləri və texniki imkanları ilə bağlı problemlər dəqiq məlumatların əldə edilməsini çətinləşdirir. Ölkədə peyk siqnallarını qəbul edən infrastruktur və “Qonets” məlumat ötürmə sistemi də mövcuddur.
Yeni sistem heyvanların hərəkətini izləməklə yanaşı, dabaq, brusellyoz, quduzluq və quş qripi kimi təhlükəli xəstəliklərin yayılmasını müəyyənləşdirməyə də kömək edə bilər. Bundan əlavə, heyvanlarla insanlar arasında mümkün münaqişələri proqnozlaşdırmaq, nadir növləri qorumaq və yolların, boru kəmərlərinin tikintisi zamanı heyvanların miqrasiya marşrutlarını nəzərə almaq mümkün olacaq.
Strateji Təşəbbüslər Agentliyinin baş direktor müavini Georgi Belozyorov bildirib ki, peyk monitorinqi təbiət haqqında məlumatların qorunmasına və onların elm, kənd təsərrüfatı, nəqliyyat və səhiyyə kimi sahələrdə istifadəsinə imkan verəcək.
Uzunmüddətli müşahidələrdən əldə edilən məlumatlar alimlərə, qoruqlara və təbiəti mühafizə fondlarına heyvan populyasiyalarının vəziyyətini qiymətləndirmək və qorunma tədbirlərinin nəticələrini izləmək üçün lazımdır.
Aysel Mehtizadə
