Payızda pişiklərin daha çox yatdığını, itlərin isə gəzintiyə daha az həvəs göstərdiyini görmək mümkündür. Lakin bu dəyişiklikləri birbaşa «payız depressiyası» adlandırmaq düzgün deyil. Çünki heyvanlarda mövsümi depressiyanın olması ilə bağlı kifayət qədər elmi sübut yoxdur. Bu barədə baytarlıq elmləri doktoru, professor Andrey Rudenko danışıb.
Bachkova Natalia/Shutterstock/Fotodom
24media.az gazeta.press saytına istinadən xəbər verir ki, ekspertin sözlərinə görə, bu dəyişikliklərin səbəblərindən biri gündəlik rejimin dəyişməsidir. Yay tətili bitdikdən sonra insanlar işə, uşaqlar isə məktəbə qayıdır. Nəticədə ev heyvanları daha uzun müddət tək qalır. Yağışlı havada gəzintilər qısalır, oyunlara və yeni təəssüratlara daha az vaxt ayrılır. Buna görə itlər daha çox diqqət istəyə, pişiklər isə az oynayıb daha çox gizlənə bilərlər.
Günlərin qısalması da heyvanların yuxusuna və aktivliyinə təsir edə bilər. Lakin bütün davranış dəyişikliklərini günəş işığının azalması ilə əlaqələndirmək düzgün deyil. Heyvanların davranışına evdəki işıqlandırma, qidalanma rejimi, gəzintilər və insanlarla ünsiyyət də təsir edir.
Ekspert fiziki narahatlığa da diqqət yetirməyi tövsiyə edir. Əgər heyvan divana tullanmaqdan çəkinirsə, ayağa çətin qalxırsa, pilləkənlərdən istifadə etmək istəmirsə və ya ona toxunanda narahat olursa, bunun səbəbi ağrı ola bilər. Belə halları yalnız yaşla və ya payız əhvalı ilə əlaqələndirmək olmaz.
Sağlam heyvanlara kömək etmək üçün gündəlik rejimi qorumaq vacibdir. Yemək, gəzinti və oyun saatlarını mümkün qədər dəyişməmək lazımdır. İtlərlə qoxuları araşdırmaq üçün gəzintilər etmək, pişiklərlə isə qısa oyunlar oynamaq faydalıdır. Heyvanın əhvalını yaxşılaşdırmaq üçün ona normadan artıq yemək vermək, baytar məsləhəti olmadan vitamin və sakitləşdirici dərmanlar istifadə etmək məsləhət görülmür.
Əgər heyvan bir qədər çox dincəlir, lakin normal yeyir, oynayır və ünsiyyət qurursa, onu müşahidə etmək olar. Ancaq heyvan qəfil halsızlaşırsa, yeməkdən imtina edirsə, arıqlayırsa, daim gizlənirsə və ya ağrı əlamətləri göstərirsə, baytara müraciət etmək lazımdır. Nəfəs almaqda çətinlik, huşun itirilməsi və sidiyə gedə bilməmək isə təcili baytarlıq yardımı tələb edir.
Aysel Mehtizadə
