Finlandiyada, xüsusilə ölkənin şərq bölgələrində qonur ayılarla qarşılaşma halları artıb. Finlandiyanın Yle teleradio şirkətinin məlumatına görə, yerli sakinlər 2023-cü ildə ayılarla bağlı polisə təxminən 45 dəfə müraciət ediblər. Bu rəqəm 2025-ci ildə 199-a çatıb, 2026-cı ilin iyununun sonuna qədər isə 400-ü ötüb.
Foto: pxhere
24media.az saint-petersburg saytına istinadən xəbər verir ki, Finlandiyada müşahidə edilən bütün ayıların Rusiya ərazisindən gəldiyini demək düzgün deyil. Hər iki ölkədəki ayı populyasiyaları bir-biri ilə əlaqəlidir və heyvanlar dövlət sərhədlərindən asılı olmayaraq meşələr arasında hərəkət edirlər.
Zooloq Mixail Kreçmar bildirib ki, radio və peyk ötürücülü boyunluqlarla izlənilən ayıların hər iki istiqamətdə hərəkət etdiyi müşahidə olunub. Bəzi ayılar nişanlandıqları ərazidən 100 kilometrdən çox uzaqlaşırlar. Mütəxəssisin sözlərinə görə, bunun səbəblərindən biri gənc erkək ayıların yeni ərazilər axtarmaq üçün doğulduqları yerləri tərk etməsi və yetkin ayılarla rəqabətdən yayınmağa çalışmasıdır.
«Ayılar dünyası» fondunun sədri Andrey İvanov da dövlət sərhədlərinin vəhşi heyvanların təbii yaşayış arealları ilə üst-üstə düşmədiyini vurğulayıb. Oxşar hərəkətlər Norveçdə də qeydə alınır. Norveçin Rovdata monitorinq xidmətinin məlumatına görə, 2025-ci ildə aparılan genetik tədqiqatlar ölkədə 185 qonur ayının olduğunu təsdiqləyib. Onların əhəmiyyətli hissəsi sərhədyanı ərazilərdə yaşayır, bəzi ayılar isə Rusiya da daxil olmaqla qonşu ölkələr arasında hərəkət edirlər.
Finlandiyada əvvəllər canavarların şimal marallarına hücumlarının artması barədə də məlumat verilib. 2025-ci ilin dekabrında yerli maralçılar yırtıcıların bir hissəsinin Rusiyadan gəlmiş ola biləcəyini ehtimal ediblər. CNN-in məlumatına görə, canavarlar həmin il Finlandiyada təxminən 1950 şimal maralını məhv ediblər. Bu, 2024-cü illə müqayisədə təxminən 70 faiz çoxdur. Laplandiya maralçılıq sahəsinin nümayəndələri vəziyyəti müşahidələrin aparıldığı bütün dövr ərzində ən ağır vəziyyətlərdən biri kimi qiymətləndiriblər.
Aysel Mehtizadə
